امریکی اور اسرائیلی میڈیا نے دعوی کیا کہ اسرائیل نے ایران کے شہر اصفہان پر رات گئے میزائل برسائے ہیں۔
امریکی نشریاتی اداروں نے امریکی حکام کا حوالہ دیتے ہوئے کہا کہ ہے اسرائیل نے جمعے کو ایران پر حملہ کیا ہے۔
نیویارک ٹائمز نے گمنام اسرائیلی عہدیداروں کے حوالے سے ایران پر حملے کا دعویٰ کیا ہے۔
میڈیا رپورٹس کے مطابق امریکی حکام کا کہنا ہے کہ اسرائیلی میزائل ایران کے شہر اصفہان کے قریب فوجی اڈے پر لگا، اسرائیل کا حملہ انتہائی محدود پیمانے کا تھا۔
دوسری جانب ایرانی حکام نے اسرائیل میزائل حملے کی تردید کرتے ہوئے کہا کہ اصفہان میں کوئی میزائل حملہ نہیں ہوا۔
اسرائیلی حکومت اور فوج نے اب تک ایران میں کسی بھی کارروائی سے متعلق کوئی بیان نہیں دیا ہے۔
ایران کے سرکاری میڈیا نے کہا ہے کہ ملک کے وسطی شہر اصفہان میں جمعے کو تین ڈرون مار گرائے ہیں۔
ایرانی میڈیا نے رپورٹ کیا ہے کہ اصفہان شہر پر ڈرون طیاروں کی پروازوں کے بعد ایئر ڈیفنس سسٹم حرکت میں آیا اور تینوں ڈرونز کو تباہ کر دیا ہے۔
ایران کے سرکاری میڈیا کے مطابق سینئر کمانڈر سیاووش مہندس کا کہنا ہے کہ ایئر ڈیفنس سسٹم نے مشکوک چیزوں کو نشانہ بنایا ہے۔
ترجمان ایرانی سائبر اسپیس سینٹر کا کہنا ہے کہ اسرائیل کے میزائل حملے کی ابھی کوئی اطلاع نہیں ہے۔
دوسری جانب عالمی جوہری ایجنسی نے بھی اپنے بیان میں کہا ہے کہ ایرانی جوہری تنصیبات کو کوئی نقصان نہیں پہنچا، صورتحال کا قریب سے مشاہدہ کر رہے ہیں۔
عالمی جوہری ایجنسی نے فریقین سے تحمل کی اپیل کرتے ہوئے کہا ہے کہ جوہری تنصیبات کو کبھی بھی فوجی تنازعات میں نشانہ نہیں بنایا جانا چاہیے۔
واضح رہے کہ حال ہی میں ایران کی جانب سے اسرائیل کے خلاف ڈرون اور میزائل حملے کیے گئے تھے جس کے بعد اسرائیل کی جانب سے جوابی کارروائی کا اعلان کیا گیا تھا۔
