براعظم افریقہ میں فرانسیسی جزیرے مایوٹ پر سمندری طوفان چیدو کے باعث 11 افراد ہلاک اور 250 سے زائد زخمی ہوگئے۔
سمندری طوفان سے ہوائی اڈے، عوامی اسٹرکچر کو شدید نقصان پہنچا ہے، کئی علاقے مکمل طور پر تباہ ہو گئے اور بجلی کی فراہمی معطل ہو گئی ہے۔
مایوٹ کے فرانسیسی عہدیدار فرانکوئیززاویر بیوول کا کہنا تھا کہ ہفتے کے روز شدید سمندری طوفان نے مایوٹ میں بڑے پیمانے پر تباہی مچائی ہے۔
انہوں نے مزید کہا کہ یہ مایوٹ سے گزشتہ 90 سالوں کے دوران ٹکرانے والا بدترین طوفان تھا۔
انھوں نے کہا کہ طوفان کے بعد ہلاکتوں اور زخمیوں کی صحیح تعداد معلوم کرنا انتہائی مشکل ہو رہا ہے۔
فرانسیسی عہدیدار بیوول کے مطابق سب سے زیادہ تباہی مایوٹ کے کچی آبادیوں میں ہوئی ہے، جہاں دھات کی جھونپڑیوں اور غیر رسمی ڈھانچوں میں لوگ رہتے ہیں۔
واضح رہے کہ مایوٹ جزیرہ بحر ہند میں افریقہ کے ساحل کے قریب واقع ہے اور یہ فرانس کا سب سے غریب جزیرہ اور یورپی یونین کا سب سے غریب علاقہ ہے۔ اس علاقے کی آبادی 3 لاکھ سے کچھ زیادہ ہے جو دو بڑے جزیروں پر پھیلی ہوئی ہے۔
