افغانستان میں ایک بار پھر تحریک طالبان پاکستان (ٹی ٹی پی) کے حافظ گل بہادر گروپ کو مبینہ فضائی حملے کا نشانہ بنایا گیا ہے، جس میں 4 دہشتگرد ہلاک اور 5 زخمی ہوئے ہیں۔
افغان نیوز ایجنسی ”آماج نیوز“ نے افغانستان کی حدود میں کئے گئے حالیہ فضائی حملے کی خبر دیتے ہوئے بتایا کہ یہ حملہ افغانستان کے صوبے پکتیکا کے ضلع ورمامئی میں 10 مئی بروز جمعہ کیا گیا تھا، لیکن افغانستان کی طالبان حکومت نے اسے چھپایا۔
افغانستان کے طالبان ذرائع نے مذکورہ افغان نیوز ایجنسی کو دی گئی اطلاع میں دعویٰ کیا کہ یہ حملہ پاکستانی فضائیہ کی جانب سے کیا گیا تھا۔
یہ بھی واضح نہیں ہوسکا کہ یہ حملہ ڈرون سے کیا گیا تھا یا اس میں جنگی طیاروں کا استعمال کیا گیا تھا۔
ذرائع نے افغانستان کی حدود میں ہوئے فضائی حملے کی تصدیق کرتے ہوئے بتایا کہ یہ حملہ اس وقت ہوا جب حافظ گل بہادر گروپ کے دہشتگرد افغاسنتان سے پاکستان میں داخل ہونے کی کوشش کر رہے تھے۔
خیال رہے کہ مذکورہ حملہ 9 مئی کو امریکی سینٹرل کمانڈ (یو ایس سینٹ کام) کے کمانڈر جنرل مائیکل ایرک کوریلا کے خیبرپختونخوا کے افغانستان سے متصل علاقوں کے دورے کے فوراً بعد کیا گیا ہے۔
ایک اور افغان خبر رساں ایجنسی نے ”افغانستان انٹرنیشنل“ نے دعویٰ کیا ہے کہ افغان طالبان نے حالیہ فضائی اور میزائل حملوں کے جواب میں پاکستانی فوج کے وفد کا قندھار کا طے شدہ دورہ منسوخ کر دیا ہے۔
رپورٹ کے مطابق پاکستانی وفد نے اتوار کو راولپنڈی سے قندھار جانا تھا۔
پاکستان کے سیکیورٹی ذرائع نے افغانستان انٹرنیشنل کو تصدیق کرتے ہوئے بتایا کہ طالبان کی جانب سے منسوخی کو سرکاری طور پر ”موسم کی صورتحال“ سے منسوب کیا گیا تھا، تاہم، خیال کیا جاتا ہے کہ اصل وجہ پکتیکا میں جمعرات کو ہونے والے فضائی حملے ہیں۔
ابھی تک طالبان نے پکتیکا پر فضائی حملوں یا پاکستانی وفد کے دورے کی منسوخی کی وجوہات کے بارے میں کوئی سرکاری بیان جاری نہیں کیا ہے۔
