امریکی محکمہ خزانہ کی ویب سائٹ پر بتایا گیا ہے کہ حماس سے منسلک افراد اور عراقی فلائی بغداد ایئر لائن سے منسلک افراد پر نئی پابندیاں عاید کی گئی ہیں۔
امریکی محکمہ خزانہ کے بیان میں کہا ہے کہ آج کی پابندیوں میں برطانیہ اور آسٹریلیا کی طرف سےبھی پابندیاں شامل ہیں۔
ان پابندیوں میں غزہ میں حماس کے مالیاتی نیٹ ورکس اور ایسے افراد شامل ہیں جنہوں نے اسلامی جہاد اور حماس کو کرپٹو کرنسی کی منتقلی سمیت رقوم کی منتقلی میں کلیدی کردار ادا کیا تھا۔
محکمہ خزانہ نے کہا کہ پابندیوں میں عراقی گروپ کتائب حزب اللہ اور فلائی بغداد ایئرلائنز کمپنی کو بھی نشانہ بنایا گیا ہے جن پر ایرانی پاسداران انقلاب کی قدس فورس کی مبینہ مدد کرنے کا الزام ہے۔
محکمہ خزانہ کے فارن اثاثہ جات کے کنٹرول کے دفتر نے عراق میں ایران سے منسلک ملیشیا کتائب حزب اللہ کے تین رہ نماؤں اور ان کے حامیوں کے ساتھ ساتھ ایک کمپنی کو نامزد کیا ہے جس پر ملیشیاؤں کے لیے پیسہ منتقل کرنے کا الزام ہے۔
برطانیہ نے بھی حماس تحریک سے منسلک افراد پر پابندیاں عائد کیں، جن میں تحریک کے فنانسرز اور رہنما شامل ہیں۔ ان اقدامات سےحماس کو ایران سمیت دیگر گروپوں سے فنڈنگ کے ذرائع کو منقطع کرنے میں مدد ملے گی۔
