امریکہ کے وزیرِ دفاع لائیڈ آسٹن نے کہا ہے کہ جدید میزائل شکن دفاعی نظام ’تھاڈ‘ اسرائیل میں نصب کر دیا گیا ہے۔
ان کا کہنا تھا کہ اس دفاعی نظام کو بہت تیزی کے ساتھ فعال یا آپریشنل کیا جا سکتا ہے۔
ان کے بقول اس کی تنصیب توقع کے مطابق ہو رہی ہے۔
واضح رہے کہ رواں ماہ اسرائیل پر ایرانی بیلسٹک میزائل حملے کے بعد امریکا نے اینٹی میزائل سسٹم ’تھاڈ‘ کو عملے سمیت اسرائیل بھجوانے کا اعلان کیا تھا۔
دوسری جانب اسرائیل کی فوج نے اعلان کیا ہے کہ وہ لبنان میں حزب اللہ کے مالیاتی بازو کو نشانہ بنا رہی ہے۔
فوج نے بیان میں یہ بھی کہا ہے کہ وہ بیروت اور دیگر مقامات کو بھی اس کی تنصیبات کو نشانہ بنا رہی ہے۔
اسرائیلی انٹیلی جینس کے ایک اہلکار نے نام ظاہر نہ کرنے کی شرط پر بتایا ہے کہ ’القرد الحسن‘ نامی ادارے کو پورے لبنان میں نشانہ بنایا جا رہا ہے۔
اسرائیلی اہلکاروں کا دعویٰ ہے کہ القرد الحسن وہ ادارہ ہے جو حزب اللہ کے اہلکاروں کو ادائیگیاں کرتا ہے جب کہ یہ عسکری تنظیم کو اسلحہ خریدنے میں بھی معاونت کرتا ہے۔
یہ ادارہ مالیاتی معاونت فراہم کرتا ہے۔ البتہ امریکہ اور سعودی عرب اس پر پابندیاں عائد کر چکے ہیں۔
