امریکی ریاست پنسلوانیا کے لانکاسٹر ایئرپورٹ کے قریب ایک چھوٹا طیارہ گر کر تباہ ہو گیا۔
حادثے کے نتیجے میں طیارے میں سوار پانچ افراد شدید زخمی ہو گئے۔
رپورٹ کے مطابق سنگل انجن والا بیچ کرافٹ بونینزا طیارہ مینہم ٹاؤن شپ کے علاقے بریدرن ولیج میں ایک پارکنگ لاٹ میں گر کر تباہ ہو گیا، جہاں موجود کئی گاڑیاں بھی جل گئیں۔
خوش قسمتی سے زمین پر موجود کسی شخص کے زخمی ہونے کی اطلاع نہیں ملی۔
حادثے سے کچھ لمحے قبل پائلٹ اور ایئر ٹریفک کنٹرول کے درمیان ہونے والی گفتگو کی آڈیو بھی سامنے آئی ہے۔
آڈیو میں پائلٹ نے طیارے کے دروازے کے کھلے ہونے اور تیز ہوا کے شور کی شکایت کی تھی۔ ایکس (سابقہ ٹوئٹر) پر شیئر کی گئی آڈیو میں ایئر ٹریفک کنٹرولر کو کہتے سنا جا سکتا ہے:
“طیارہ نیچے گر چکا ہے، ٹرمینل کے پیچھے پارکنگ لاٹ میں درختوں کے قریب۔”
عینی شاہد نے بتایا “میں نے طیارے کو اوپر جاتے اور پھر بائیں جانب جھکتے دیکھا، اور پھر وہ زمین پر آ گرا۔ جیسے ہی طیارہ گرا، فوری طور پر آگ کا ایک بڑا گولہ اٹھا۔ دھواں بہت زیادہ تھا اور آگ بجھانے میں کافی دشواری پیش آ رہی تھی۔”
فی الحال پانچوں زخمیوں کو ہسپتال منتقل کر دیا گیا ہے، جہاں ان کا علاج جاری ہے۔ ایف اے اے اور دیگر متعلقہ ادارے حادثے کی وجوہات جاننے کے لیے تحقیقات کر رہے ہیں۔
