وائٹ ہاؤس نے دعوی کیا ہے کہ روس نے ایک نیا سیٹلائٹ شکن ہتھیار تیار کر لیا ہے۔
قومی سلامتی کونسل کے ترجمان جان کربی نے کہا کہ امریکی انٹیلی جنس حکام کے پاس معلومات ہیں کہ روس نے یہ صلاحیت حاصل کر لی ہے لیکن فی الحال ایسا ہتھیار کام نہیں کر رہا ہے۔ امریکی حکام ابھرتی ہوئی اس ٹیکنالوجی کے بارے میں دستیاب معلومات کا تجزیہ کر رہے ہیں اور اس معاملے پر اتحادیوں اور شراکت داروں سے مشاورت کی ہے۔
کربی نے کہا نصب کیے جانے والے ہتھیار کی صلاحیت فعال نہیں ہے، تاہم روس کی جانب سے یہ صلاحیت حاصل کرنے کی کوشش پریشان کن ہے، لیکن اس سے کسی کی سلامتی کو فوری طور پر کوئی خطرہ نہیں ہے۔
کربی نے تسلیم کیا کہ یہ ایک سنگین معاملہ ہے۔ ان خدشات پر روس سے براہ راست بات کرنے کی کوشش کریں گے۔
کریملن کے ترجمان دیمتری پیسکوف نے روس کی نئی فوجی صلاحیت کے بارے میں دعووں کو یوکرین کے لیے امریکی کانگریس کی امداد کی ایک چال قرار دیا۔
پیسکوف نے کہا کہ یہ واضح ہے کہ واشنگٹن کانگریس کو امدادی بل پر ووٹ ڈالنے کے لیے کسی بھی طریقے سے مجبور کرنے کی کوشش کر رہا ہے۔ دیکھتے ہیں کہ وائٹ ہاؤس کیا طریقہ استعمال کرے گا۔