امریکہ کا سنوار کی ہلاکت کے بعد نیتن یاہو پر غزہ جنگ بندی کے لیے دباؤ

امریکی وزیر خارجہ انٹنی بلنکن نے منگل کے روز اسرائیلی وزیر اعظم بنجمن نیتن یاہو پر زور دیا کہ وہ حماس کے رہنما یحییٰ سنوار کی ہلاکت کا فائدہ اٹھاتے ہوئے غزہ میں حماس کے ساتھ جنگ ختم کریں۔

انٹنی بلنکن نے کہا حماس کے قید میں موجود 101 یر غمالوں کی رہائی کو یقینی بنائیں۔

ڈھائی گھنٹے کی میٹنگ کے بارے میں نیتن یاہو نے بلنکن کو بتایا کہ سنوار کی ہلاکت یرغمالوں کی رہائی اور اسرائیل کے لیے بحیرہ روم کے ساتھ واقع غزہ کی پٹی میں حماس کی حکمرانی کے خاتمے کے اسکے مقصد کے حصول پر “مثبت اثر” ڈال سکتی ہے۔

انٹنی بلنکن نے نیتن یاہو سے شمالی غزہ میں پھنسے ہزاروں شہریوں تک امداد پہنچانے کی اجازت دینے کا مطالبہ بھی کیا۔

محکمہ خارجہ کے ترجمان میتھیو ملر نے کہا کہ بلنکن نے اسرائیلی رہنما پر زور دیا کہ غزہ میں تنازع اس طرح ختم کیا جائے جو اسرائیلیوں اور فلسطینیوں دونوں کو یکساں طور پر پائدار سیکیورٹی فراہم کرے۔

ملر نے کہاانہوں نے تنازع کے بعد کے دور میں آگے بڑھنے کے لیے ایک ایسا نیا راستہ متعین کرنے کی اہمیت پر تبادلہ خیال کیا جو فلسطینیوں کو اپنی زندگیوں کی تعمیر نو اور غزہ کے لیے گورننس، سیکورٹی اور تعمیر نو کی سہولت فراہم کرے۔

نیتن یاہو اور بلنکن نے لبنان میں ایرانی حمایت یافتہ حزب اللہ کے عسکریت پسندوں کے ساتھ اسرائیل کی جاری لڑائی پر بھی تبادلہ خیال کیا۔

اسرائیلی رہنما نے بلنکن کو بتایا کہ لبنان میں سیکورٹی اور سیاسی تبدیلی کی ضرورت ہے جس سے بے گھر اسرائیلی شمالی اسرائیل میں اپنے گھروں کو محفوظ طریقے سے واپس جا سکیں۔