یوکرین کے وزیر دفاع رستم عمروف نے کہا ہے کہ ’ریاض میں یوکرین اور امریکی حکام کے درمیان بات چیت کا تازہ ترین دور نتیجہ خیز اور فوکسڈ رہا ہے۔‘
سوشل میڈیا پر ایک بیان میں یوکرینی وزیر دفاع رستم عمروف نے کہا کہ ’ہم نے امریکی ٹیم کے ساتھ بات چیت مکمل کر لی ہے۔ بات چیت ’نتیجہ خیز اور فوکسڈ‘ رہی۔ ہم نے توانائی سمیت اہم نکات پر بات کی۔ یوکرین منصفانہ اور پائیدار امن کے اپنے مقصد کو ’حقیقت‘ بنانے کے لیے کام کر رہا ہے۔‘
انہوں نے کہا کہ ’بات چیت میں توانائی کی تنصیبات اور اہم انفراسٹرکچر کے تحفظ کی تجاویز پر بات کی گئی، جو امریکی صدر ڈونلڈ ٹرمپ کی جانب سے تین سالہ جنگ کے خامتے کے لیے سفارتی کوششوں کا حصہ ہے۔‘
یوکرین کے وزیر دفاع رستم عمروف نے کہا کہ ہم منصفانہ امن کو قریب لانے اور سکیورٹی کو مضبوط بنانے کے لیے یوکرین کے صدر کی ہدایت پر عمل کر رہے ہیں۔
سعودی عرب میں ہونے والی ملاقات پیر کو امریکی اور روسی وفود کے درمیان باضابطہ بات چیت سے پہلے ہوئی ہے
دوسری جانب امریکہ کے قومی سلامتی کے مشیر مائیک والٹز نے کہا کہ امریکہ اعتماد سازی کے متعدد اقدامات کے ذریعے بات کر رہا ہے جس کا مقصد جنگ کو ختم کرنا ہے۔
