اٹالین اوپن ٹینس :جرمن سٹارالیگزینڈر زویروف نے دوسری مرتبہ ٹورنامنٹ جیت لیا

جرمن ٹینس اسٹار الیگزینڈر زویروف نے چلی کے الیجینڈرو ٹیبیلو کو شکست دے کر دوسری مرتبہ اٹالین اوپن ٹینس ٹورنامنٹ میں مردوں کا سنگلز ٹائٹل اپنے نام کرلیا۔

سنگلز مقابلوں کے فائنل میچ میں جرمنی کے 27 سالہ زویروف نے شاندار کارکردگی کا مظاہرہ کرتے ہوئے حریف کو اسٹریٹ سیٹس میں 4-6 اور 5-7سے ہرا کر ٹورنامنٹ جیت لیا۔

اس فتح کے ساتھ ہی الیگزینڈر زویروف کے اے ٹی پی ٹائٹلز کی تعداد 22 ہوگئی ہے۔

الیگزینڈر زویروف نے دوسری مرتبہ اٹالین اوپن ٹینس کا ٹائٹل اپنے نام کیا ہے۔

اس سے قبل انہوں نے 2017 کا اٹالین اوپن ٹینس ٹورنامنٹ جیتا تھا جس کے فائنل میچ میں انہوں نے سربین اسٹار نوویک جوکووچ کو اسٹریٹ سیٹس میں شکست دی تھی۔