ایران نے افغانستان کے سفارت خانے کے قائم مقام سربراہ کو اپنے قومی ترانے کی بےادبی پر طلب کر لیا
تہران نے کہا کہ افغان عہدے دار نے ایران کے قومی ترانے کے احترام میں کھڑے نہ ہو کر اس کی بے ادبی کی ہے۔
ایرانی وزارت خارجہ کے ایک بیان میں کہا گیا ہے کہ افغان اہلکار کے”غیر روایتی اور ناقابل قبول اقدام” کے بعد”سخت احتجاج” درج کرایا گیا ہے۔
بیان میں اسلامی اتحاد کانفرنس میں کابل کے نمائندے کو”اسلامی جمہوریہ کے قومی ترانے کی بے ادبی” کے لیے مورد الزام ٹھیرایا گیا ہے۔
وزارت خارجہ نے اس اقدام کو سفارتی آداب کے خلاف قرار دیتے ہوئے اس کی مذمت کی ہے۔
ایران کے بیان میں مزید کہا گیا ہےکہ مہمان کی طرف سے میزبان ملک کی علامتوں کا احترام کرنے کی واضح ضرورت ہے۔
جمعے کو تہران میں کانفرنس میں شرکت کے لیے آئے افغان اہلکار نے ایک معذرتی ویڈیو پوسٹ کی جس میں کہا کہ ان کا مطلب بے عزتی نہیں تھا لیکن یہ کہ ترانے کے دوران بیٹھنا ان کا رواج ہے۔
یاد رہے کہ اسی طرح کا ایک واقعہ پاکستان میں بھی پیش آیا تھا جب افغان عہدے دار پاکستان کا قومی ترانہ بجائے جانے کے وقت بیٹھے رہے تھے۔
