یورپی ملک نیدرلینڈز کے شہر ایمسٹرڈیم میں یورپا لیگ کے ایک میچ کے بعد پر تشدد واقعات پھوٹ پڑے۔
شہر کے مختلف مقامات پر ہونے والے تشدد کے واقعات کے بعد پانچ زخمی افراد کو اسپتال میں داخل کیا گیا جبکہ پولیس نے 62 لوگوں کو گرفتار کر لیا۔
ایمسٹرڈیم شہر کی پولیس نے کہا کہ فسادیوں نے اپنی ٹیم کی حمایت کرنے والے اسرائیلی شائقین کو نشانہ بنایا۔
حکام کے بقول اسرائیلی حامیوں پر شہر کے متعدد علاقوں میں حملے کیے گئے۔ پولیس نے کئی بار مداخلت کر کے اسرائیلی حامیوں کو ان کے ہوٹلوں تک پہنچایا۔
ایمسٹرڈیم شہر کی طرف سے جاری ہونے والے ایک بیان کے مطابق شہر میں پولیس کی بھاری نفری تعینات کیے جانے کے باوجود اسرائیل کے حامی زخمی ہو ئے۔
ایمسٹرڈیم میں ہونے والے واقعات پر فلسطین فٹ بال ایسوسی ایشن نے دعوی کیا کہ پرتشدد واقعات کا آغآز اسرائیلی ٹیم مکابی تل ابیب کے شائقین کی طرف سے کیا گیا تھا۔
پی ایف اے کا کہنا ہے کہ اسرائیلی شائقین نے ان گھروں اور دکانوں پر حملہ کیا تھا جہاں فلسطینی پرچم لگا تھا۔
فلسطینی فٹ بال ایسوسی ایشن نے کہا ہے کہ وہ وسیع شواہد کے جواب میں فٹ بال کی عالمی گورننگ باڈی فیفا کی جانب سے کسی “ٹھوس کارروائی” کا انتظار کر رہی ہے۔
ایمسٹرڈیم کے پولیس چیف نے پی ایف اے کے الزامات کی کچھ حمایت کرتے ہوئے کہا کہ میچ سے 24 گھنٹے قبل بدھ کو “دونوں طرف سے واقعات” سامنےآئے تھے۔
