بھارت میں سپاری لینے کے لئے سوشل میڈیا پلیٹ فارمز اسنیپ چیٹ اورا نسٹاگرام کا سہارا لیا جانے لگا۔
بھارتی پولیس کے مطابق معروف سیاست دان بابا صدیقی کے قاتلوں نے آپس میں رابطوں کے لئے اسنیپ چیٹ استعمال کیا۔
حکام کا خیال ہے کہ ملزم نے گرفتاری سے بچنے کے لیے بابا صدیقی کے قتل میں ملوث دیگر مشتبہ افراد سے انسٹاگرام اور اسنیپ چیٹ کے ذریعے بات چیت کی۔
تحقیقات سے یہ بھی پتہ چلا ہے کہ ملزمان ریکی کے دوران اسنیپ چیٹ کے زریعے لوکیش شئیر کرتے تھے۔
پولیس کا کہنا ہے قتل میں ملوث مبینہ مرکزی شوٹر شیوکمار گوتم نے بلجیت سنگھ اور کشیپ کو کرلا میں کرائے کے مکان میں یوٹیوب ویڈیوز کا استعمال کرتے ہوئے ہتھیاروں کی تکنیک میں مہارت حاصل کرنے کی تربیت دی تھی۔
پولیس کے مطابق قتل کے لیے وسیع منصوبہ بندی کی گئی اور ملزمان نے سیکنڈ ہینڈ موٹر سائیکل پر بابا صدیقی کے گھر اور دفتر کی ریکی کی۔
پولیس حکام کا ماننا ہے کہ ملزمان نے مقتول رہنما کے گھر اور دفتر کی نگرانی کے لیے جس موٹر سائیکل کو استعمال کیا اُسی کے ذریعے جائے واردات پر پہنچنے کا منصوبہ بنایا تھا۔
حکام کے مطابق حملے کے دن دو ملزمان موٹرسائیکل سے نیچے گر گئے، اس لیے وہ آٹو رکشہ میں ذیشان صدیقی کے دفتر پہنچے۔
انڈیا میں ممبئی پولیس نے بابا صدیقی قتل کیس میں مطلوب ایک ملزم کی تلاش کا اشتہار دیا ہے۔
نیشنل کانگریس پارٹی (این سی پی) کے رہنما بابا صدیقی کے قتل کے الزام میں چار افراد گرفتار گرفتار کیے جا چکے ہیں جبکہ ایک ملزم شبھم لونکر کی تلاش میں عوام میں مدد طلب کی گئی ہے اور اس کے لیے اشتہار جاری کیا گیا ہے۔
پولیس حکام نے اب تک جن چار افراد کو گرفتار کیا ہے، اُن میں ہریانہ کے رہائشی 23 سالہ گرو میل بلجیت سنگھ اور اتر پردیش کے 19 سالہ دھرمراج راجیش کشیپ شامل ہیں، دونوں اس معاملے میں مبینہ شوٹر ہیں۔
گرفتار کیے گئے دیگر افراد میں ہریش کمار بالاکرم نشاد اور پروین لونکر شامل ہیں، جو مفرور ملزم شبھم لونکر کا بھائی ہے۔
پولیس کے مطابق پونے میں ایک ڈیری فارم چلانے والے شبھم لونکر سے جون میں باندرہ میں اداکار سلمان خان کی رہائش گاہ کے باہر فائرنگ کے واقعے پر بھی پوچھ گچھ کی گئی تھی۔
پولیس کے مطابق ملزم کا تعلق لارنس بشنوئی گینگ سے بتایا جاتا ہے۔ رواں سال کے آغاز میں شبھم لونکر کو مہاراشٹر کے اکولا ضلع میں آرمز ایکٹ کے تحت گرفتار کیا گیا تھا، جب اُن کے قبضے سے دس سے زیادہ پستول برآمد کیے گئے تھے۔
پولیس نے بتایا تھا کہ ملزم سے پوچھ گچھ میں انمول بشنوئی سے روابط کا انکشاف ہوا تھا جو بدنام گینگسٹر لارنس بشنوئی کے بھائی ہیں۔
پولیس کے مطابق ملزم شبھم لونکر ضمانت پر رہا ہونے کے بعد 24 ستمبر سے لاپتہ ہیں۔
