برطانیہ میں مسلسل تیز ہواؤں کے باعث لندن کے ہیتھرو ائیرپورٹ پر آج 100 پروازیں منسوخ کردیں۔
رپورٹ کے مطابق 100 پروازوں کا منسوخ ہونا انتہائی غیر معمولی ہے اور اس کے نتیجے میں 15 ہزار سے زائد مسافر متاثر ہوئے۔
ائیر پورٹ حکام نے مسافروں سے گھروں سے نکلنے سے پہلے پروازوں کا شیڈول چیک کرنے کی درخواست کی ہے ۔
برطانوی میڈیا کے مطابق اسکاٹ لینڈ اور آئرلینڈ کے درمیان فیری سروس بھی معطل کردی گئی ہے۔
اسکاٹ لینڈ، ناردرن آئرلینڈ اور ویلز سمیت شمالی و مغربی انگلینڈ میں رات 9 بجے تک تیزہواؤں کی ییلو وارننگ جاری کردی گئی ہے۔
کرسمس منانےگھروں سےگاڑیوں پر نکلے ہزاروں افراد کو بھی پریشانی کا سامنا ہے۔
برطانوی ریل کمپنی نے بھی خبردار کیا ہے کہ تیز ہوائیں ریل نظام کو بھی متاثر کرسکتی ہیں جس کے نتیجے میں ٹرینوں کی روانگی میں تاخیر یا منسوخی کا بھی سامنا کرنا پڑسکتا ہے۔
