بنگلہ دیش کے بانی شیخ مجیب کا گھر نذرآتش

بنگلہ دیش کے دارالحکومت ڈھاکہ میں شیخ حسینہ واجد کے سوشل میڈیا پر حامیوں سے خطاب پر شدید احتجاج کیا گیا۔

مشتعل مظاہرین نے بنگلہ دیش کے بانی شیخ مجیب الرحمان کے آبائی گھر کو آگ لگا دی۔

ایک بڑے ہجوم نے بلڈوزر مارچ کرتے ہوئے مفرور سابق وزیراعظم  شیخ حسینہ کے آبائی گھر کو آگ لگائی، پھر کرین سےگھر گرا دیا۔

شیخ حسینہ نے رہائش گاہ پر حملے کے مقصد پر سوال اٹھاتے ہوئے کہا کہ ’اس گھر سے ڈرنے کی کیا وجہ ہے؟ میں بنگلہ دیش کے عوام سے انصاف مانگتی ہوں۔ کیا میں نے اپنے ملک کے لیے کچھ نہیں کیا؟ پھر یہ بے عزتی کیوں؟ یہ وہ واحد یادیں ہیں جو میری بہن اور میں نے سنبھال کر رکھی تھیں، مگر اب انہیں مٹایا جا رہا ہے۔ ایک عمارت کو ختم کیا جا سکتا ہے، مگر تاریخ کو مٹایا نہیں جا سکتا‘۔

انہوں نے خبردار کیا کہ تاریخ اپنا انتقام ضرور لیتی ہے۔