بھارتی ریاست اتر پردیش سے 5 باررکن قانون ساز اسمبلی منتخب ہونے والے معروف مسلمان سیاستدان مختار انصاری جمعرات 28 مارچ کی شام جیل میں انتقال کرگئے۔
بانڈا ضلع جیل میں بند مختار انصاری کو روزہ افطار کرنے کے بعد طبیعت خراب ہونے پر رانی درگاوتی میڈیکل کالج لے جایا گیا۔ اس سے قبل ڈاکٹروں کو ان کے علاج کے لیے جیل بلایا گیا تھا جن کے یہ بتانے پر کہ سیاستدان کو دل کا دورہ پڑا ہے، اُنہیں فوری طور پراسپتال لے جایا گیا۔
مختار انصاری کے بیٹے عمر انصاری نے نامہ نگاروں سے بات کرتے ہوئے کہا کہ ان کے والد کوکھانے کے ذریعے زہر دیا گیا۔
اہلخانہ کے الزمات کے بعد مجسٹریٹ کی جانب سے مختار انصاری کی موت کا سبب جاننے کے لئے تحقیقات کا حکم دے دیا گیا ہے۔
مختار انصاری ستمبر 2022 سے یوپی کی مختلف عدالتوں سے 8 مقدمات میں سزا سنائے جانے کے بعد سے بانڈا جیل میں قید تھے۔
ان کی اچانک موت کے بعد احتجاج کے خدشے پر بھارتی انتظامیہ نے کئی شہروں میں سیکورٹی ہائی الرٹ کردی ہے۔
مختار انصاری ماؤ صدر کے حلقے سے 5 بار ایم ایل اے رہ چکے ہیں۔
ان کے خلاف 60 سے زیادہ مجرمانہ مقدمات زیر التوا تھے۔
مختار انصاری کو ستمبر 2022 سے یوپی کی مختلف عدالتوں نے 8 معاملوں میں سزا سنائی تھی اور وہ بانڈا جیل میں بند تھے۔
بھارتی حکومت نے مختار انصاری کا نام گزشتہ سال سال اتر پردیش پولیس کی طرف سے جاری 66 گینگسٹرز کی فہرست میں شامل کروایا تھا۔
