غزہ معاہدے کے تحت حماس اور اسرائیل کے درمیان قیدیوں کے تبادلے کا پانچواں مرحلہ آج کامیابی سے مکمل ہوگیا ہے۔
فلسطینی مزاحمتی تنظیم حماس نے مزید 3 اسرائیلی قیدیوں کو رہا کردیا۔
حماس نے جنگ بندی معاہدے کے تحت یرغمالیوں کی رہائی کے پانچویں مرحلے میں 3 اسرائیلی قیدیوں کو رہا کیا جن کی رہائی دیر البلاح شہر سے کی گئی ہے۔
حماس نے 56 سالہ اوہاد بن ایمی، 52 سالہ ایلی شرابی اور 34 سالہ اور لیوی کو رہا کیا جنہیں دیر البلاح میں بنائے گئے اسٹیج پر لایا گیا جس کے بعد انہیں ریڈ کراس کی کمیٹی کے سپرد کیا گیا۔
اسرائیل نے بھی جیلوں میں قید 183 فلسطینی قیدیوں کو رہا کردیا جن میں 18 ایسے قیدی شامل ہیں جو عمر قید اور 54 لمبی قید کی سزا کاٹ رہے تھے۔
مقبوضہ مغربی کنارے پہنچنے پر فلسطینیوں قیدیوں کا والہانہ استقبال کیا گیا اور پھولوں کی پتیاں نچھاور کی گئیں۔
اسرائیل عقوبت خانوں میں سالوں سے قید اپنے پیاروں سے ملنے پر رقت آمیز مناظر بھی دیکھے گئے۔
اسرائیلی فوج کے تشدد سے زخموں سے چور اور خرابی صحت پر 7 فلسطینی قیدیوں کو فوری اسپتال منتقل کیا گیا۔ اسرائیلی جیلوں سے رہا ہونے والے 183 میں سے 111 فلسطینیوں کو غزہ پہنچایا گیا جہاں ان کے عزیز و اقارب نے والہانہ استقبال کیا۔
