خیبر پختونخوا میں انسدادِ پولیو مہم میں پولیس پر حملے، دو اہلکار ہلاک

پاکستان میں رواں برس کی انسدادِ پولیو کی آخری مہم شروع ہوتے ہی خیبر پختونخوا کے جنوبی اضلاع بنوں اور کرک میں سیکیورٹی پر مامور پولیس پر حملوں میں دو اہلکار ہلاک اور ایک زخمی ہو گئے ہیں۔

انسدادِ پولیو مہم میں شامل افراد پر پہلا حملہ خیبر پختونخوا کے ضلع کرک میں پیر کو علی الصبح پیش آیا جہاں نامعلوم عسکریت پسندوں نے فائرنگ کر کے ایک پولیس ہیڈ کانسٹیبل کو ہلاک اور پولیو ورکر کو زخمی کر دیا۔

زخمی اہل کار کو قریبی اسپتال منتقل کر دیا گیا ہے جہاں پر ڈاکٹروں کے مطابق ان کی حالت تسلی بخش ہے۔

کرک کے ضلعی پولیس افسر خان خیل نے حملے میں پولیو ٹیم کے ساتھ ڈیوٹی پر مامور پولیس حوالدار عرفان خان کی ہلاکت اور ایک پولیو ورکر کی زخمی ہونے کی تصدیق کی۔

انسدادِ پولیو مہم میں شامل افراد پر دوسرا حملہ بنوں کے تھانہ صدر کی حدود میں ہوا ہے جہاں پر پولیو اہلکاروں پر نامعلوم افراد نے فائرنگ کر کے ایک پولیس اہلکار کو زخمی کر دیا۔ اہل کار نے بعد میں زخموں کی تاب نہ لا کر اسپتال میں دم توڑ دیا۔

ادھر ٹانک میں انسدادِ پولیو مہم میں شامل رضاکاروں کی حفاظت کے لیے پولیس اہل کاروں کو لے جانے والی گاڑی کو حادثہ پیش آیا ہے جس کے نتیجے میں 12 اہلکار زخمی ہوئے ہیں۔

جنوبی ضلع ٹانک میں انسدادِ پولیو مہم میں شامل رضا کاروں اور اہل کاروں کی حفاظت کے لیے پولیس اہل کاروں کو لے جانے والی گاڑی کو حادثہ پیش آنے کے نتیجے میں 12 پولیس اہل کار زخمی ہوئے ہیں۔

1990 کی دہائی کے اوائل سے اب تک پولیو مہم کے دوران پاکستان میں 200 سے زائد پولیو ورکر اور پولیس اہلکاروں نے اہنی جانوں کا نذرانہ پیش کیا ہے

پاکستان میں اس سال وائلڈ پولیو وائرس ٹائپ ون (ڈبلیو پی وی ون) پھر سے تیزی سے پھیلاؤ کا سامنا کر رہا ہے اور اب تک 63 کیسز رپورٹ ہو چکے ہیں۔ ان میں سے 26 بلوچستان، 18 خیبر پختونخوا، 17 سندھ اور ایک ایک کیس پنجاب اور اسلام آباد میں سامنے آئے ہیں۔