دبئی میں رمضان المبارک کے آغاز پر بھیک مانگنے کے خلاف شروع کی گئی مہم کے تحت اب تک 127 بھکاریوں کو گرفتار کیا جا چکا ہے۔
دبئی حکام کے مطابق رمضان المبارک کے دوران دبئی میں بھیک مانگنے کے واقعات میں اضافہ دیکھنے میں آتا ہے، بھیک مانگنے والے افراد اس مقدس مہینے میں عوام کی سخاوت کا فائدہ اٹھانے کی کوشش کرتے ہیں۔
رواں برس دبئی پولیس نے رمضان المبارک کے آغاز پر بھیک مانگنے کے خلاف مہم شروع کی تھی جس کے ابتدائی دو ہفتوں کے دوران میں 127 بھکاریوں کو گرفتار کیا گیا اور ان کے قبضے سے 50 ہزار درہم ( لگ بھگ 38 لاکھ پاکستانی روپے ) برآمد کرلیے گئے۔
دبئی پولیس کے مطابق زیادہ تر بھکاریوں کو مساجد اور ان کے اطراف سے گرفتار کیا گیا ہے۔
یاد رہے کہ دبئی پولیس نے گزشتہ سال 384 بھکاریوں کو گرفتار کیا تھا جبکہ 2023 میں یہ تعداد 499 تھی۔
مزید برآں دبئی حکومت کے اعدادوشمار کے مطابق، گزشتہ پانچ سالوں میں 2085 بھکاریوں کو گرفتار کیا گیا گیا ہے۔
