دو چینی شہریوں کی ہلاکت اور پھر کشیدگی میں اضافے کے بعد چین نے تائیوان کے زیر کنٹرول جزیروں کے قریب گشت میں اضافہ کردیا ہے۔
چینی کوسٹ گارڈ کا کہنا ہے کہ وہ اس علاقے میں اپنی فوجی نقل و حرکت میں اضافہ کررہے ہیں۔
چینی ساحلی محافظوں کے ترجمان گان یو نے ایک بیان میں کہا کہ گشت کا مقصد ’ماہی گیروں کی جانوں کی حفاظت کرنا ہے۔‘
گزشتہ ہفتے 14 فروری کو کنمین جزائر کے قریب تائیوان کے ساحلی محافظوں کے تعاقب کے دوران ایک چینی کشی الٹ گئی تھی۔ واقعے میں 2 افراد ہلاک جبکہ دو افراد کو بچا لیا گیا تھا۔
چین نے اس واقعے کی مذمت کرتےہوئے تائیوان پر زور دیا ہے کہ وہ کشتی کے عملے کے دو زندہ بچ جانے والے ارکان کو رہا کرے، جنہیں حراست میں لیا گیا تھا۔
تائیوان نے چین پر الزام عائد کرتے ہوئے کہا کہ کشتی کنمین جزائر کے ٓگرد ’ممنوعہ پانیوں کے اندر‘ تھی (یہ علاقہ تائیوان کے زیر انتظام ہے لیکن چین کے شہر زیامن سے صرف 5 کلومیٹر کے فاصلے پر واقع ہے)۔
چین تائیوان کو اپنی سرزمین کا حصہ ہونے کا دعویٰ کرتا ہے اور ایک دن اس جزیرے کو اپنے کنٹرول میں لانے کا عزم کیا ہے۔
