انڈیا کے مشہور پنجابی گلوکار اور کانگریس کے رہنما سدھو موسے والا کے قتل کی ذمہ داری قبول کرنے والے گینگسٹر گولڈی برار کو انڈہن حکومت نے دہشت گرد قرار دے دیا ہے۔
انڈیا کی وزارت داخلہ نے غیرقانونی سرگرمیوں کی روک تھام کے قانون(یو اے پی اے) کے تحت کینیڈا میں مقیم گینگسٹر گولڈی برار کو دہشت گرد قرار دیا۔
گولڈی برابر کا اصل نام ستوندرجیت سنگھ ہے جو 2017 میں اسٹوڈنٹ ویزے پر کینیڈا گئے تھے۔
انڈیا کی وزارت داخلہ کے نوٹیفیکیشن میں کہا گیا کہ ’اپریل 1994 میں پیدا ہونے والے ستوندرجیت سنگھ جو شمشیر سنگھ اور پریتپال کور کے بیٹے ہیں، وہ کینیڈا کے علاقے برامٹن میں مقیم ہیں اور خالصتان کے حامی دہشت گرد گروپ ببّر خالصہ کے ساتھ منسلک ہیں۔‘
مرکزی حکومت کا کہنا ہے کہ گولڈی برار ڈرونز کے ذریعے سرحد کے آر پار ممنوعہ ہتھیاروں اور دھماکہ خیز مواد کی اسمگلنگ میں بھی ملوث ہیں۔ یہ ہتھیار پرتشدد سرگرمیوں میں استعمال ہوتے ہیں۔
گزشتہ برس انڈیا کی حکومت نے انٹرپول کو گولڈی برار کے متعلق ریڈ کارنر نوٹس بھی جاری کیا تھا۔
گولڈی برار نے پنجاب کے علاقے مانسا میں 2022 میں ہونے والے سدھو موسے والا کے قتل کی ذمہ داری قبول کی تھی۔سدھو موسے والا قتل کیس کی 1850 صفحات کی چارج شیٹ میں گولڈی برار کو اس واقعے کا ماسٹر مائنڈ قرار دیا گیا ہے۔
