روسی حکومت نے فری ڈیموکریٹک پارٹی سے تعلق رکھنے والے جرمن تھنک ٹینک، فریڈرک ناومین فاونڈیشن کو “ناپسندیدہ” قرار دیتے ہوئے اس پر پابندی لگادی ہے۔
ماسکو کی جانب سے سن 2015 میں منظور کردہ ایک قانون کے تحت یہ لازمی ہے کہ “ناپسندیدہ” قرارد ی جانے والی تنظیموں کو روس میں اپنی سرگرمیاں بند کردینی چاہئے۔
یہ قانون روسی حکام کو ایسی تنظیمو ں کے کسی بھی دفتر کو بند کرنے کے ساتھ ساتھ ان کے بینک اکاونٹس اور اثاثوں کو منجمد کرنے کا بھی اختیار دیتا ہے۔
مزید یہ کہ اگر کوئی روسی شہری ان تنظیموں سے رابطہ رکھتا ہے تو اس کے خلاف مجرمانہ قانونی چارہ جوئی کی جاسکتی ہے۔
روس نے کئی تنظیموں مثلا ً انسانی حقوق کی تنظیموں ایمنسٹی انٹرنیشنل اور ہیومن رائٹس واچ کے دفاتر بند کردیے ہیں۔
فاونڈیشن کا کہنا ہے کہ یہ روس کی طرف سے “شہری اور انسانی حقوق کے لیے خطرے” کی علامت ہے۔
فاونڈیشن کے ایگزیکٹو بورڈ نے جمعرات کو بتایا تھا کہ روسی وزارت انصاف نے اس تنظیم کو ایک دن قبل ہی بلیک لسٹ کردیا تھا۔
