روسی اور يوکرينی افواج کے درمیان جمعے کی درميانی شب شديد جھڑپيں ہوئی ہيں۔
يوکرينی شہر سومی ميں روس کے ايک فضائی حملے کے نتيجے ميں شہری بنيادی ڈھانچے کو نقصان پہنچا اور کئی مقامات پر آگ بھڑک اٹھی۔
يوکرينی جنرل اسٹاف نے بتایا کہ ماسکو کی جانب سے ايک ميزائل حملہ اور اٹھارہ ڈرون حملے کئے گئے۔ يوکرينی افواج نے بارہ ڈرونز کو فضا ميں ہی ناکارہ بنانے کا بھی دعوی کیا ہے۔
دوسری جانب روسی افواج کا دعوی ہے کہ سومی، کريوی ريہ، پولٹاووا اور وينٹسيا ميں ان کے ڈرونز نے اپنے اہداف کو کامیابی سے نشانہ بنايا۔
اطلاع ہے کہ کارلوکا نامی شہر ميں روسی فوج نے اپنا پرچم لہرا ديا ہے۔ روسی افواج نے اسٹريٹيجک اہميت کے حامل شہر کورينوو پر قبضہ کرنے کا دعوی کیا ہے۔
یوکرینی فوج کی جانب سے روس کے علاقے بلگورود پر شیلنگ کی گئی جس کے نتیجے میں 5 افراد ہلاک جبکہ 37 زخمی ہوگئے۔
روس کے مطابق یوکرینی فوج کےکلسٹر بموں سے حملے میں ایک خاتون اور 4 مرد موقع پر ہی ہلاک ہوگئے، 6 بچوں سمیت 37 افراد زخمی ہوئے۔ حملے سے دو گھروں، ایک گاڑی اور گیراج کو آگ لگ گئی۔
يوکرينی حکومت نے انٹرنيشنل اٹامک انرجی ايجنسی کو ايک خط لکھا ہے، جس ميں ايجنسی کو مطلع کيا گيا کہ روسی فضائی حملوں کے نتيجے ميں يوکرين کو عارضی بنيادوں پر اپنے جوہری ری ايکٹرز کو بند کرنا پڑاہے۔
