روس نے یوکرین کے مختلف علاقوں میں تازہ فضائی حملے کیے ہیں، قریب دو برس قبل شروع ہونے والی اس جنگ کے ابتدائی دنوں کے بعد سے ان حملوں کو اب تک کے شدید ترین حملے قرار دیا جا رہا ہے۔
یوکرینی صدر وولودومیر زیلنسکی نے کہا ہے کہ 29 دسمبر کو روس کی طرف سے یوکرین میں کیے جانے والے فضائی حملوں میں کم از کم 39 افراد ہلاک جبکہ 159 دیگر زخمی ہوئے۔
قبل ازیں ہلاک ہونے والوں کی تعداد 18 بتائی گئی تھی۔
یوکرینی حکام کے مطابق ان حملوں کا نشانہ مختلف اسکول، ایک میٹرنٹی اسپتال، شاپنگ سنٹرز اور کئی ایک رہائشی بلاکس بنے۔
ان حملوں کے حوالے سے یوکرینی صدر وولودومیر زیلنسکی کا کہنا تھا کہ، ’روس نے اپنے ذخیرے میں موجود قریب ہر ایک ہتھیار سے ہم پر حملہ کیا ہے۔‘
یوکرینی فوج کے اندازوں کے مطابق روس نے 158 میزائل اور ڈرون یوکرین کی طرف داغے جن میں سے 114 کو فضا میں تباہ کر دیا گیا۔
یوکرینی ایئرفورس کے ترجمان یوری اِگنیٹ نے بتایا کہ یہ روس کی طرف سے جنگ کے ابتدائی دنوں کے علاوہ اب تک کا سب بڑے میزائلوں کی ریکارڈ تعداد کے ساتھ کیا گیا حملہ تھا۔
