روس نے یوکرین پر اب تک کا سب سے بڑا ڈرون حملہ کیا ہے جس سے کئی گھر تباہ ہو گئے ہیں۔
حکام کے مطابق کیف کے اوبوخیف ضلع میں ایک خاتون ہلاک اور کم از کم تین افراد زخمی ہوئے، جن میں ایک چار سالہ بچہ بھی شامل ہے۔
یوکرین نے دعویٰ کیا ہے کہ روس نے مکمل حملے کے آغاز کے بعد سب سے بڑا ڈرون حملہ کیا ہے، جس میں دارالحکومت کیف سمیت ڈنیپروپیٹروسک اور ڈونیٹسک کے مشرقی علاقوں کو نشانہ بنایا گیا۔
یوکرین کی ایئر فورس کا کہنا ہے کہ صبح کے وقت روس کی جانب سے مختلف شہروں پر 273 ٖڈرون حملے کیے گئے اور یہ تین برس کے دوران ہونے والا سب سے بڑا حملہ ہے۔
یوکرین کی فضائیہ کے مطابق روس نے مجموعی طور پر 273 ڈرون حملے کیے جن میں سے 88 کو مار گرایا گیا جبکہ 128 ڈرون راستہ بھٹک گئے اور کسی نقصان کا باعث نہ بنے۔
یہ حملہ امریکی و روسی صدور کے درمیان جنگ بندی سے متعلق بات چیت سے ایک روز قبل ہوا جو کہ آج ہونی ہے۔
یوکرین کی انٹیلی جنس سروس نے یہ امکان بھی ظاہر کیا ہے کہ ہو سکتا ہے کہ ماسکو مغربی مماک کو خوفزدہ کرنے کی غرض سے بیلسٹک میزائل بھی فائر کرے۔
ماسکو کی جانب سے اس ضمن میں فی الوقت کوئی ردعمل سامنے نہیں آیا ہے۔
