ریاض فیشن ویک کے دوسرے ایڈیشن کی بھرپور تیاریاں

سعودی فیشن کمیشن کی میزبانی میں ریاض فیشن ویک کے دوسرے سیزن کے لیے بھرپور تیاریوں کا آغاز کر دیا گیا ہے۔

ریاض فیشن ویک ایونٹ کے آفیشل انسٹاگرام پیج کے حوالے سے بتایا گیا ہے کہ پانچ روزہ دوسرا فیشن ایڈیشن 17 سے 21 اکتوبر تک جاری رہے گا۔

رواں سال ریاض فیشن ویک کے دوران 30 سے ​​زیادہ سعودی ڈیزائنرز کت ملبوسات کو عوام کے سامنے پیش کیا جائے گا۔

گذشتہ سال کے ریاض فیشن ایڈیشن میں عاشی اسٹوڈیو، 1886، یوسف اکبر اور عروہ البناوی کے برینڈز نے اپنے جدید ڈیزائنز کے ساتھ حصہ لیا تھا۔

سعودی فیشن کمیشن کے سی ای او بورک کیک میک نے اپنے ایک بیان میں کہا ہے’اس سال کا ایونٹ نہ صرف ہمارے افتتاحی ایڈیشن کی کامیابی پر استوار ہے بلکہ فیشن انڈسٹری میں منفرد اور جدید انداز کے ساتھ نئی منزل کی جانب ایک مستحکم قدم ہے۔‘

بورک نے مزید کہا ’ ہم ثقافتی تبادلے اور تعاون کے لیے ایک ایسا پلیٹ فارم تشکیل دے رہے ہیں جو متعدد برانڈز کو یکجا کرکے سعودی ٹیلنٹ کو عالمی سطح پر ابھارنے میں اہم کردار ادا کرے گا۔‘