سری لنکا کی پولیس نے کہا ہے انسداد منشیات کی ایک ہفتے تک جاری رہنے والی مہم کے دوران تقریباً 15 ہزار افراد کو گرفتار کیا گیا ہے۔
اتوار کو پولیس نے ایک بیان میں کہا ہے کہ ’انصاف‘ نامی اس کارروائی کے نتیجے میں تقریباً 440 کلوگرام (970 پاؤنڈ) منشیات ضبط کر لی گئی ہیں جن میں 272 کلوگرام بھنگ، 35 کلوگرام چرس اور 9 کلوگرام ہیروئن شامل ہیں۔
حکام کا خیال ہے کہ بحر ہند کے جزیرے کو منشیات کے اسمگلنگ ٹرانزٹ پوائنٹ کے طور پر استعمال کیا جا رہا ہے۔
پولیس نے بیان میں کہا ہے کہ 13 ہزار 666 مشتبہ افراد کو گرفتار کیا گیا جبکہ 11 سو نشے کے عادی افراد کو حراست میں لیا گیا ہے اور انہیں علاج کے لیے فوج کے زیر انتظام ایک مرکز بھیج دیا گیا ہے۔
مقامی میڈیا نے پولیس اور سپاہیوں کی فوٹیج نشر کیں جو دارالحکومت اور دیگر علاقوں میں گھروں کی تلاشی کے لیے سونگھنے والے کتوں (سنفنگ ڈاگز) کا استعمال کر رہے ہیں۔
انسانی حقوق کے وکیل حجاز حزب اللہ نے کہا ہے کہ پولیس کے چھاپے غیرقانونی تھے کیونکہ وہ سرچ وارنٹ کے بغیر کیے گئے۔
انسانی حقوق کی کارکن امبیکا ساتکون نیتھن نے کہا کہ چھاپے ثبوت کی بنیاد پر نہیں بلکہ صرف غریب علاقوں کو ہدف بنایا گیا۔اسمگلروں کو گرفتار نہیں کیا گیا۔
