سعودی عرب میں ایک ہفتے کے دوران 17 ہزار غیر قانونی تارکین کو گرفتار کر لیا گیا۔
غیر قانونی تارکین کے خلاف کام کرنے والی مشترکہ کمیٹی کی جانب سے جاری بیان میں کہا گیا کہ 20 فروری سے 26 فروری 2025ء کے دوران غیرقانونی تارکین کی گرفتاری کے لئے کارروائیاں کی گئیں۔
جاری کردہ رپورٹ کے مطابق گرفتار ہونے والوں میں 10 ہزار 397 اقامہ قوانین کی خلاف ورزی، 4 ہزار 128 گرفتار شدگان سرحدی قوانین کی خلاف ورزی اور دو ہزار 864 تارکین لیبر قوانین کی خلاف ورزی میں ملوث تھے۔
کمیٹی نے بتایا کہ مذکورہ عرصے کے دوران ایک ہزار 483 افراد گرفتار ہوئے ہیں جو سرحد عبور کرکے ملک میں غیر قانونی طور پر داخل ہونے کی کوشش کر رہے تھے جن میں سے 41 فیصد یمنی، 56 فیصد ایتھوپیائی اور 3 فیصد دیگر ممالک کے تارکین شامل تھے۔
غیر قانونی تارکین کو سہولت فراہم کرنے پر 15 افراد گرفتار کئے گئے۔
سعودی عرب کی وزارت داخلہ نے بیان میں کہا ہے کہ غیر قانونی تارکین کو کسی بھی قسم کی سہولت فراہم کرنا سنگین جرم ہے، جس پر 15 سال قید اور 10 لاکھ ریال جرمانہ ہوسکتا ہے۔
