آسٹریلیا میں گرجا گھر میں پادری پر چاقو سے وار کرنے والے 16 سالہ نوجوان کے خلاف دہشت گردی کی دفعات کے تحت مقدمہ درج کر لیا گیا ہے۔
پولیس کی انسداد دہشت گردی کی مشترکہ ٹیم نے جمعرات کو نوجوان سے پوچھ گچھ کی اور دہشت گردی کے جرم کا مرتکب ہونے پر اس کے خلاف مقدمہ درج کیا۔
جرم ثابت ہونے پر انہیں زیادہ سے زیادہ عمر قید کی سزا ہو سکتی ہے۔
نیو ساؤتھ ویلز کی ریاستی پولیس کمشنر کیرن ویب نے ایک پریس کانفرنس کے دوران کہا کہ نوجوان کی ضمانت مسترد کر دی گئی ہے۔
انہوں نے کہا کہ پولیس یہ بیان دے گی کہ پادری پر چاقو کے چھ وار کیے گئے اور نوجوان نے اپنے گھر سے چرچ پہنچنے کے لیے 90 منٹ کا سفر کیا تھا۔
53 سالہ پادری مار ماری ایمینوئل کو ٹک ٹاک پر بہت سے نوجوان فالو کرتے ہیں اور وہ سوشل میڈیا پر تنقید اور آن لائن ٹرولنگ کا نشانہ بنتے رہتے ہیں۔
وہ اپنے مذہبی وعظ میں اسلام، کووڈ ویکسینیشن، ہم جنس پرستی اور امریکی صدر جو بائیڈن کے انتخاب پر شدید تنقید کرتے رہے ہیں۔
گرجا گھر میں پادری پر حملہ پیر کو اُن کی تقریر کی لائیو سٹریمنگ کے دوران کیا گیا تھا۔
