امریکی خفیہ ایجنسی سی آئی اے کے ہیڈکوارٹر کے باہر سیکورٹی اہلکار کی جانب سے مشکوک گاڑی پر فائرنگ سے ایک خاتون زخمی ہوگئیں۔
خاتون اپنی گاڑی لے کر داخلی دروازے تک پہنچیں اور سکیورٹی عملے کی جانب سے روکے جانے پر رکنے سے انکار کر دیا۔
سیکورٹی پر مامور اہلکار کی جانب سے فوری ایکشن لیتے ہوئے مشکوک گاڑی پر فائرنگ کی گئی۔
حکام کا کہنا ہے کہ زخمی خاتون کو فوری طور پر طبی امداد کے لیے قریبی اسپتال منتقل کر دیا گیا۔
سی آئی اے کے ترجمان نے واقعے کی تصدیق کرتے ہوئے کہا کہ ہیڈکوارٹر کے باہر ایک سکیورٹی واقعہ پیش آیا جس پر قانون نافذ کرنے والے ادارے فوری طور پر متحرک ہو گئے۔ مین گیٹ تاحکمِ ثانی بند کر دیا گیا ہے، اور مزید تفصیلات مناسب وقت پر جاری کی جائیں گی‘۔
واقعے کی تحقیقات فی الحال سی آئی اے اور ایف بی آئی مشترکہ طور پر کر رہے ہیں۔
سی آئی اے کا ہیڈکوارٹر امریکہ کے دارالحکومت واشنگٹن ڈی سی سے تقریباً نو میل دور ریاست ورجینیا کے علاقے لینگلی میں واقع ہے۔
