امریکی وزیرِ تجارت ہاورڈ لٹنک کا کہنا ہے کہ صدر ڈونلڈ ٹرمپ کینیڈا اور میکسیکو سے مصنوعات کی درآمد پر لگائے گئے ٹیرف کو کم کرنے کے لیے بدھ کے روز ایک معاہدے کا اعلان کر سکتے ہیں۔
ایک انٹرویو میں انھوں نے دعویٰ کیا کہ وہ پورا دن کینیڈا اور میکسیکو کے حکام کے ساتھ رابطے میں تھے جو یہ ثابت کرنے کی کوشش کر رہے تھے کہ وہ طاقتور اوپیوئڈ فینٹینیل کی امریکہ میں اسمگلنگ کو کم کرنے کی کوشش کریں گے۔
لٹنک کے خیال میں امریکی صدر ٹیرف ختم کرنے کے بجائے انھیں کم کر دیں گے۔
ان کے مطابق ٹرمپ کچھ لو، کچھ دو کی پالیسی کے تحت اس کا کوئی نہ کوئی حل نکال لیں گے۔
لٹنک کا کہنا ہے کہ ہم شاید کل اس بارے میں کوئی اعلان کرنے جا رہے ہیں۔
کینیڈا کی وزیرِ خارجہ میلانی جولی نے بتایا ہے کہ ان کے دفتر سے اس معاہدہ کے بارے میں کوئی رابطہ نہیں کیا گیا ہے۔
کینیڈا کی وزیرِ خارجہ کا کہنا تھا کہ امریکی حکام جو چاہے کہہ سکتے ہیں لیکن اصل فیصلہ صدر ٹرمپ نے لینا ہے۔
امریکہ کی جانب سے کینیڈا کی مصنوعات پر 25 فیصد محصولات عائد کیے جانے کے بعد کینیڈا نے جواباً 107 ارب ڈالرز کی امریکی مصنوعات پر 25 فیصد ٹیرف لگانے کا اعلان کیا ہے۔
