اولمپکس کی افتتاحی تقریب کے دوران فرانسیسی وزیرِ کھیل 46 سالہ ایمیلی اوڈیا کاسٹیرا کی صدر ایمانوئل میکرون کو مضبوطی سے گلے لگانے اور گردن پر بوسہ دینے کی تصاویر سوشل میڈیا پر وائرل ہوگئیں۔
یہ منظر پیرس اولمپکس کے آغاز میں دریائے سین پر افتتاحی تقریب میں دیکھنے کو ملا۔
افتتاحی تقریب میں فرانسیسی خاتون وزیر کھیل جو خود بھی کھلاڑی رہ چکی ہیں شاندار تقریب کے انعقاد پر جذبات پر قابو نہ رکھ سکیں اور ملکی صدر کو آتا دیکھ کر ان کے گلے لگ گئیں۔
اس موقع پر کسی نے تصویر کھینچ لی اور سب سے پہلے مقامی میگزین مادام فیگارو نے شائع کی جس کے بعد یہ تصویر سوشل میڈیا کی زینت بن گئی۔ تصویر میں دیگر وزرا اور اعلیٰ حکام بھی موجود ہیں۔
سوشل میڈیا پر صارفین نے تصویر کو ناپسند کیا اور خاتون وزیر کھیل کو آڑے ہاتھوں لے لیا۔
صارفین کا کہنا تھا کہ وزیر کھیل نے موقع محل نہیں دیکھا اور عالمی سطح کی تقریب کے مراتب کا خیال نہیں کیا۔
فرانسیسی صدر ایمانوئیل میکرون اور وزیر کھیل کی جانب سے تصویر پر کسی قسم کا ردعمل سامنے نہیں آیا۔
