امریکی صدر ڈونلڈ ٹرمپ نے ایک مرتبہ پھر پاک بھارت جنگ بندی کا کریڈٹ لیتے ہوئے کہا ہے کہ ہم نے اس معاملے کو تجارت کے ذریعے حل کیا۔
انھوں نے کہا کہ ہم پاکستان اور بھارت کے ساتھ بڑے معاہدے کرنے جارہے ہیں۔
وائٹ ہاؤس میں جنوبی افریقہ کے صدر سے ملاقات کے بعد صحافیوں سے گفتگو میں صدر ٹرمپ نے پاکستان اور بھارت کے درمیان جنگ بندی معاہدے کی تعریف کی۔
انہوں نے ایک بار پھر جنگ بندی کا کریڈٹ لیتے ہوئے کہا کہ پاکستان اور بھارت کے ساتھ بڑے معاہدے کر رہے ہیں، دونوں ممالک کے درمیان مسئلہ بڑے سے بڑا، گہرے سے گہرا اور بدترین ہوتا جا رہا تھا۔
انہوں نے جنوبی افریقہ کے صدر کو مخاطب کرتے ہوئے کہ آپ دیکھیں کہ ہم نے پاکستان اور بھارت کے ساتھ کیا کیا؟ ہم نے پورے معاملے کو حل کیا اور میرا خیال ہے کہ میں نے یہ تجارت کے ذریعے کیا، اور ہم بھارت اور پاکستان کے ساتھ بڑے معاہدے کرنے جارہے ہیں۔
انہوں نے کہا کہ میں نے ان سے کہا، آپ لوگ کیا کر رہے ہیں؟، کسی نہ کسی کو تو آخر میں گولی چلانی ہی تھی،لیکن صورتحال بدتر ہوتی جا رہی تھی، فائرنگ میں اضافہ ہو رہا تھا، مسئلہ مزید پیچیدہ اور مختلف ملکوں میں پھیلتا جا رہا تھا۔
معرکہ بنیان مرصوص /امریکی صدر ٹرمپ ایک بار پھر پاکستانی عوام اور قیادت کے معترف
صدر ٹرمپ نے ایک بار پھر پاکستان کی امن پسندانہ پالیسیوں اور قیادت کی تعریف کی
پاکستان کے لوگ اور قیادت اعلی معیار کے حامل ہیں صدرٹرمپ
ہم نے پاکستان اور بھارت میں جنگ بندی کرائ، صدر ٹرمپ
پاکستان… pic.twitter.com/hcmXrNPJIF
— PTV News (@PTVNewsOfficial) May 22, 2025
ہم نے ان سے بات کی، اور میرا خیال ہے کہ ہم نے معاملے کو کسی حد تک حل کر لیا۔ لیکن دو دن بعد کچھ اور ہو جاتا ہے، اور الزام مجھ پر ڈال دیا جاتا ہے، وہ کہتے یہ ٹرمپ کی وجہ سے ہوا۔
صدر ٹرمپ نے کہا کہ پاکستان میں کچھ شاندار لوگ ہیں، اور وہاں ایک زبردست لیڈر بھی موجود ہے، بھارت میں میرا دوست نریندر مودی ہے، وہ ایک بہترین انسان اور لیڈر ہے، میں نے دونوں کو فون کیا، اور ہم نے مل کر کچھ اچھا کیا۔
امریکی صدر نے کہا کہ ہم نے روس اور یوکرین کے مسئلے کو حل کرنے کی بھی کوشش کی، میں نے پرسوں صدر پیوٹن سے تقریباً ڈھائی گھنٹے تک تفصیلی بات چیت کی، وہاں ہر ہفتے 5 ہزار فوجی مررہے ہیں، اس میں شہروں اور قصبات میں رہنے والوں کی تعداد الگ ہے۔
