اسرائیل کو جنوبی غزہ میں واقع سرنگ سے چھ یرغمالیوں کی لاشیں ملی ہیں ۔
اسرائیلی فوج کے ترجمان ریئر ایڈمرل ڈینیئل ہگاری نے الزم لگایا کہ یرغمالیوں کو حماس نے قتل کیا۔
اسرائیلی فوج کے مطابق کارمل گاٹ، ہرش گولڈ برگ پولن، ایڈن یروشلمی، الیگزینڈر لوبانوو، الموگ سروسی اور اوری دانینو کی لاشیں اسرائیل منتقل کر دی گئی ہیں۔
فوجی ترجمان کا مزید کہنا تھا کہ کچھ دن قبل جنوبی اسرائیل کی بدو برادری سے تعلق رکھنے والے قائد فرحان القاضی کو اس مقام سے ایک کلو میٹر دور سے بازیاب کیا گیا تھا۔
وائٹ ہاؤس کی طرف سے جاری کردہ بیان کے مطابق صدر بائیڈن نے ان ہلاکتوں پر شدید غم و غصے کا اظہار کیا ہے۔
صدر بائیڈن نے امریکی شہری ہرش گولڈ برگ پولن کے اہل خانہ کے ساتھ اظہار ہمدردی کیا ہے۔
ان کا کہنا تھا کہ حماس کے رہنماؤں کو اپنے جرائم کا خمیازہ بھگتنا پڑے گا۔
فلسطینی مزاحمتی تنظیم حماس کا کہنا ہے کہ جن یرغمالیوں کی لاشیں ملیں وہ اسرائیلی فوج کی جانب سے کیے گئے فضائی حملوں میں ہلاک ہوئے۔
حماس رہنما عزت الرشیق کے مطابق رفح شہرکی سرنگ میں6 مغوی اسرائیلی فضائی حملوں میں مارےگئے تھے، یرغمالیوں میں امریکی اسرائیلی اور ایک روسی اسرائیلی شہری شامل تھا۔
عزت الرشیق کا مزید کہنا تھا کہ ہم اپنے قیدیوں کی زندگیوں کا جوبائیڈن سے زیادہ خیال رکھتے ہیں اس لیے ہم نے جنگ بندی کے لیے ان کی تجاویز اور اقوام متحدہ کی قرارداد کو قبول کیا تھا مگر نیتن یاہو نے اسے مسترد کیا۔
