امریکا نے اسرائیلی وزراء کی جانب سے فلسطینیوں کوغزہ سے نکل جانے کے بیان کی مذمت کی ہے اور کہا ہے کہ غزہ فلسطینی سرزمین ہے اور رہے گی۔
امریکی محکمہ خارجہ کے ترجمان میتھیو ملر نے کہا کہ اسرائیلی وزراء کا بیان اشتعال انگیز اور غیر ذمہ دارانہ ہے، حماس کا اب کوئی مستقبل نہیں، کوئی دہشتگرد گروپ اب اسرائیل کیلئے خطرہ نہیں۔
ملر نے سوشل میڈیا پلیٹ فارم ”ایکس“ پر جاری بیان میں لکھا، ’امریکا نے اسرائیلی وزراء سموٹریچ اور بین گویر کے اشتعال انگیز اور غیر ذمہ دارانہ بیانات کو مسترد کر دیا ہے۔ غزہ سے بڑے پیمانے پر فلسطینیوں کی نقل مکانی نہیں ہونی چاہیے‘۔
The United States rejects the inflammatory and irresponsible statements from Israeli Ministers Smotrich and Ben Gvir. There should be no mass displacement of Palestinians from Gaza.
— Matthew Miller (@StateDeptSpox) January 2, 2024
دوسری جانب اسرائیلی فوج کی بربریت تھم نہیں سکی ہے اور غزہ پر وحشیانہ بمباری جاری ہے۔
صہیونی افواج نے دیرالبلاح، مغازی، نوصائرت کیمپوں پر حملے کیے اور چوبیس گھنٹوں میں 207 فلسطینیوں کو شہید کردیا، جس کے بعد شہداء کی مجموعی تعداد 22 ہزار 185 ہوگئی، جبکہ 57 ہزار سے زائد زخمی ہیں۔
غزہ کی ستر فیصد رہائشی عمارتیں تباہ ہوچکی ہیں، صیہونی فورسز نے فلسطینیوں کو جنوبی غزہ خالی کرنے کا حکم دیا ہے اور رفح منتقل ہونے کی ہدایت کی ہے۔
حماس کی جانب سے بھی جوابی کارروائیاں جاری ہیں جن میں کئی اسرائیلی فوجی مارے گئے اور متعدد گاڑیاں اور ٹینک تباہ ہوگئے۔
