غزہ میں جنگ بندی کے اعلان کے بعد بھی اسرائیلی فوج کے حملے جاری ہیں
اسرائیلی فوج کے حملوں میں گزشتہ 24 گھنٹوں کے دوران کم از کم 87 فلسطینیوں کو ہلاک کردیا گیا ہے۔
رپورٹ میں بتایا گیا کہ وسطی غزہ کے دیر البلاح سے میں جنگ بندی کے معاہدے کے اعلان کے بعد سے مرنے والوں میں 21 بچے اور 25 خواتین شامل ہیں۔
فلسطینی مرکز برائے انسانی حقوق (پی سی ایچ آر) کی جانب سے جاری بیان میں کہا گیا کہ غزہ میں تازہ اسرائیلی حملوں کے دوران ایک کارکن ہلاک ہوگیا ہے، 33 سالہ احاب فیصل کو ان کی 29 سالہ اہلیہ حنین جمال الدہودہ اور ان کے دو بچوں 6 سالہ ریم اور 3 سالہ نجمہ کے ہمراہ صبح سویرے قتل کر دیا گیا۔
اس کے علاوہ 230 سے زائد فلسطینیوں کے زخمی ہونے کی اطلاعات بھی سامنے آرہی ہیں جب کہ نصیرت کیمپ اور رفح میں معدد عمارتیں تباہ کردی گئیں۔
واضح رہے کہ اسرائیل کے ہاتھوں ہلاک فلسطینیوں کی تعداد 46 ہزار 788 سے تجاوز کرگئی جب کہ زخمیوں کی تعداد ایک لاکھ 10 ہزار 453 ہوگئی ہے۔
دوسری جانب حماس نے واضح کیا کہ وہ اسرائیلی حملوں کے باعث غزہ کی تباہی کے بعد دوبارہ سے غزہ کی تعمیر کریں گے۔
