غیر قانونی طور پر مسقط جانے کی کوشش کے دوران پاکستانیوں کی کشتی پھنس جانے سے 3 مسافر ہلاک ہوگئے جبکہ 17 کو ریسکیو کرلیا گیا۔
غیر قانونی طور پر مسقط جانے کی کوشش کرنے والے پاکستانیوں کی کشتی ایرانی سرحد کے قریب گہرے سمندر میں پھنس گئی، راستہ بھٹک جانے سے مسافر کئی دن تک بھوکے پیاسے رہے۔
کشتی میں سوار 17افراد کو پاکستانی ماہی گیروں نے ریسکیو کر کے ایرانی سرحد تک پہنچایا۔
ڈپٹی کمشنر گوادرحمودالرحمان نے بتایا کہ 20 پاکستانی غیرقانونی طور پر ایران کے راستے مسقط جانے کی کوشش کے دوران کشتی خراب ہوجانے پر گہرے سمندرمیں راستہ بھٹک گئے تھے۔
انہوں نے بتایا کہ اس دوران شکار کے لیے گہرے سمندر میں موجود پاکستانی ماہی گیروں نے کشتی دیکھ کر اس میں مسافروں کو کھانا اورپانی فراہم کیا ور انہیں محفوظ طریقے سے ایرانی سرحد تک پہنچایا ۔
ڈپٹی کمشنر کے مطابق کشتی میں سوار افراد نے بتایا کہ وہ 20دن سے سمندرمیں بھوک اورپیاس کا مقابلہ کر رہے تھے اور ان کے 3 ساتھی بھی انتقال کر چکے تھے۔
ڈی سی کے مطابق قانونی تقاضے پورے کر کے تمام 17 مسافروں کو واپس ایف آئی اے کے ذریعے پاکستان لایاجائے گا۔
