پیرس کی عدالت نے ظہیر محمود نامی پاکستانی شہری کو 2020 میں ہفتہ وار میگزین ’چارلی ہیبڈو‘ کے دفتر کے باہر دو افراد پر گوشت بنانے میں استعمال ہونے والے تیز دھار بغدے سے حملہ کرنے کے الزام میں 30 سال قید کی سزا سنادی ہے۔
عدالت نے ظہیر محمود کو قتل کی کوشش کرنے اور دہشت گردانہ سازش کا حصہ بننے کا مجرم قرار دیا۔
عدالت کی جانب سے جرم ثابت ہونے پر ظہیر کو 30 سال قید کی سزا سنانے کے ساتھ دوبارہ فرانس میں داخل ہونے پر پابندی بھی عائد کردی گئی ہے۔
واضح رہے حملے کے وقت ظہیر محمود کی عمر 29 برس تھی۔
حکام کے مطابق پاکستان کے دیہی علاقوں سے تعلق رکھنے والا ظہیر محمود 2019 میں غیر قانونی طور پر فرانس پہنچا تھا۔
رپورٹ کے مطابق 25 ستمبر 2020 کو صبح تقریباً 11:40 بجے ظہیر چارلی ہیبڈو کے دفتر کے پرانے پتہ پر پہنچ کر خطرناک آلے (بغدے) سے پریمیئرز لیگنس نیوز ایجنسی کے دو ملازمین کو شدید زخمی کر دیا تھا۔
ظہیر محمود کے ساتھ پاکستان کے تعلق رکھنے والے مزید 5 دیگر افراد کا کیس بھی عدالت میں زیر سماعت تھا۔ جن پر دہشت گردی کی سازش کا حصہ بننے کا الزام تھا۔ عدالت نے ظہیر کے سہولت کاروں کو 3 سے 12 سال قید کی سزا کا اعلان کیا تھا۔
تمام ہی افراد فرانسیسی دہشت گردی کے مجرموں کی فہرست میں درج تھے۔
خیال رہے کہ چارلی ہیبڈو نے القاعدہ سے منسلک دو بندوق برداروں کے حملے کے بعد اپنے دفتر کی جگہ تبدیل کرلی تھی۔ حملہ آوروں نے میگزین آفس کے عملے کے 8 ارکان سمیت 12 افراد کو ہلاک کیا تھا۔
میگزین کی جانب سے شائع کیے گئے توہین آمیز خاکوں کے ردعمل میں 7 جنوری 2015 کو میگزین کے دفتر پر حملہ کیا گیا تھا جس میں مدیر اور کارٹونسٹ سمیت 12 افراد ہلاک ہوگئے تھے جب کہ حملہ آور دونوں بھائی بھی پولیس مقابلے میں مارے گئے تھے
