فرانس میں ایک گھر سے خاتون اور ان کے 4 بچوں کی لاشیں ملی ہیں جس پر پولیس نے ایک مشتبہ شخص کو حراست میں لے لیا۔
فرانس کے شہر میوکس میں مقتولین کے رشتے دار اُن سے ملنے گھر آئے تھے۔ دروازہ نہ کھولے جانے پر انھوں نے پولیس کو اطلاع دی تھی۔
پولیس گھر کے اندر داخل ہوئی تو خون میں لت پت 5 لاشیں پڑی ہوئی تھیں اور مقتولہ کا شوہر لاپتہ تھا جب کہ گھر میں کوئی توڑ پھوڑ کی گئی تھی اور نہ ہی کچھ چوری کیا گیا تھا۔
گھر سے جن 4 بچوں کی لاشیں ملی ہیں ان کی عمریں 9 ماہ سے 10 سال کے درمیان ہیں جب کہ خاتون کی عمر 30 سال کے لگ بھگ ہے۔ پولیس مقتولہ کے شوہر اور بچوں کے 33 سالہ والد کی تلاش میں ہے۔
پولیس نے ایک مشتبہ شخص کو حراست میں بھی لیا ہے جس کی شناخت ظاہر نہیں کی گئی ۔
فرانس میں بچوں کے قتل کا یہ تیسرا واقعہ ہے۔ نومبر کے آخر میں 41 سالہ شخص نے اپنی 4، 10 اور 11 سالہ بیٹیوں کو قتل کرکے خودکشی کرلی تھی جب کہ اکتوبر میں بھی ایک پولس اہلکار نے اپنی 3 بیٹیوں کو قتل کرنے کے بعد خودکشی کی تھی۔
