فرانسیسی صدر کا کہنا ہے کہ اسرائیل کی طرف سے دو ریاستوں پر مشتمل حل قبول نہ کیے جانے کے باعث پیرس معاملات کو بحسن و خوبی نپٹانے کے لیے فلسطینی ریاست کو تسلیم کرنے کی طرف جاسکتا ہے۔
پیرس میں اردن کے شاہ عبداللہ ثانی کے ساتھ میڈیا سے گفتگو میں فرانسیسی صدر ایمینوئل نے کہا کہ فلسطینی ریاست کو تسلیم کرنے کے معاملے میں اردن بھی ہمارے ساتھ ہے جو اس خطے میں ہمارا پارٹنر ہے۔
صدر ایمینوئل نے کہا کہ ہم اردن کی قیادت سے مل کر کام کر رہے ہیں۔ ہم یورپی پارلیمنٹ اور سلامتی کونسل میں اپنا کردار ادا کرنے کے لیے تیار ہیں۔
فرانسیسی صدر کا یہ بھی کہنا تھا کہ فلسطینیوں کی امنگوں کو ایک زمانے سے کچلا جارہا ہے۔
بیشتر یورپی ممالک فلسطینی ریاست کو تسلیم نہیں کرتے اور اس بات پر زور دیتے ہیں کہ پہلے جامع مذاکرات کیے جائیں۔
2014 میں فرانس کے قانون سازوں نے ایک قرارداد کے حق میں ووٹ دے کر اپنی حکومت پر زور دیا تھا کہ وہ فلسطینی ریاست کو تسلیم کرے تاکہ مشرقِ وسطیٰ میں حقیقی اور پائیدار امن کی راہ ہموار ہو۔
