پاکستان کے آرمی چیف جنرل عاصم منیر نے کہا ہے کہ ڈیجیٹل دہشت گردی کا مقصد پاکستانی قوم میں نفاق اور مایوسی پھیلانا ہے۔
فوج کو کمزور کرنا پاکستان کو کمزور کرنے کے مترادف ہے۔ فوج اور قوم کے اعتماد کا رشتہ نہ کوئی قوت کمزور کر سکی ہے اور نہ کر سکے گی۔
ایبٹ آباد کی کاکول ملٹری اکیڈمی میں پاکستان کے یومِ آزادی کے سلسلے میں ہونے والی تقریب سے خطاب میں فوجی سربراہ جنرل عاصم منیر کا مزید کہنا تھا کہ ڈیجیٹل دہشت گردی کا مقصد جھوٹی خبروں اور پروپیگنڈے کے ذریعے پاکستانی قوم میں نفاق اور مایوسی پھیلانا ہے۔
جنرل عاصم منیر نے کہا کہ ریاستی اداروں اور عوام کے درمیان خلیج پیدا کرنے والے عناصر کو مایوسی کے سوا کچھ حاصل نہیں ہوگا۔ اس کے نتیجے میں وہ عناصر مزید رسوائی کا شکار ہوں گے۔
ان کا مزید کہنا تھا کہ پاکستانی قوم کا غیر متزلزل اعتماد فوج کا قیمتی اثاثہ ہے۔ فوج کو کمزور کرنا پاکستان کو کمزور کرنے کے مترادف ہے۔ اعتماد کے اس رشتے کو نہ کوئی قوت کمزور کر سکی ہے اور نہ ہی آئندہ کر سکتی ہے۔
آرمی چیف نے کہا کہ خیبر پختونخوا میں فتنہ الخوارج المعروف تحریک طالبان پاکستان کی ریاست اور شریعت مخالف سرگرمیوں کی وجہ سے دہشت گردی کے فتنے نے پھر سر اٹھایا ہے جس کے خلاف قانون نافذ کرنے والے ادارے برسرِ پیکار ہیں، یہ عناصر اگر پاکستان کے آئین کو نہیں مانتے تو ہم بھی ان کو پاکستانی نہیں مانتے۔
جنرل عاصم منیر نے کہا کہ افغانستان فتنہ الخوارج کو اپنے خیر خواہ پڑوسی ملک پر ترجیح نہ دیں۔
پاکستانی فوج کے سربراہ نے افغانستان میں برسرِ اقتدار طالبان سے مطالبہ کرتے ہوئے کہا کہ ٹی ٹی پی کے فتنے کے خاتمے میں پاکستان کا ساتھ دیں جس طرح پاکستان نے ہمیشہ آپ کا ساتھ دیا ہے۔
یومِ آزادی پر خطاب میں آرمی چیف جنرل عاصم منیر کا یہ بھی کہنا تھا کہ فوج بلوچستان کی سالمیت اور فلاح و بہبود کے لیے کلیدی کردار ادا کرتی رہے گی۔
