لاس اینجلس میں آگ سے متاثرہ عمارتوں کا ملبہ ہٹانے پر پابندی عائد

امریکی ریاست کیلیفورنیا کے شہر لاس اینجلس میں لگی آگ سے تباہ ہونے والی عمارتوں کا ملبہ ہٹانے پر پابندی عائد کردی گئی۔

یہ پابندی اس وقت تک برقرار رہے گی کہ جب تک خطرناک مواد کی جانچ کرنے والا محکمہ اپنی تحقیقات مکمل نہیں کرلیتا۔

حکام کا کہنا ہے کہ عمارتوں کے ملبے، راکھ اور گرد میں ایسبیسٹوس، بھاری دھاتیں اور دیگر خطرناک مواد شامل ہوسکتے ہیں۔

حکام کے مطابق یہ خطرناک اجزا سانس کے ذریعے، جلد پر لگنے سے یا پینے کے پانی میں شامل ہوکر جسم میں داخل ہوسکتے ہیں۔

ملبے کو نامناسب طریقے سے ٹھکانے لگانے سے ان خطرناک مادوں کے پھیلاؤ کا خطرہ پیدا ہوسکتا ہے جس سے امدادی کارکنوں، رہائشیوں اور ماحول کو نقصان پہنچ سکتا ہے۔

خیال رہے کہ لاس اینجلس میں 7 جنوری سے لگی آگ پر تاحال قابو نہیں پایا جاسکا ہے۔

یہ آگ اب تک 37 ہزار ایکڑ سے زائد رقبے کو متاثر کرچکی ہے اور اس کے نتیجے میں اب تک 25 افراد ہلاک جبکہ ایک لاکھ سے زائد بے گھر ہوچکے ہیں۔