لبنان میں امریکی سفارت خانے پر مسلح شخص نے فائرنگ کردی
لبنانی فوج کا کہنا ہے کہ امریکی سفارت خانے پر حملہ آور فائرنگ کے تبادلے میں زخمی ہوگیا جسے گرفتار کرنے کے بعد اسپتال منتقل کردیا گیا ہے۔
لبنانی فوج کے مطابق امریکی سفارت خانے پر فائرنگ کرنے والا حملہ آور شامی شہری ہے۔
بیروت کے شمال میں واقع امریکی سفارت خانے نے’’ ایکس‘‘ پر بتایا کہ عمارت کے داخلی دروازےکے قریب فائرنگ کی گئی ،دہشتگردی کے واقعے میں اس کا عملہ محفوظ رہا۔فائرنگ ہوتے ہی سفارت خانے کے دروازے بند کر دیئے تھے۔
ایک سیکیورٹی ذریعے نے میڈیا کو بتایا ہے کہ حملہ آور کی گولی سے ایک لبنانی ملازم زخمی ہوگیا ہے اور اسے آنکھ میں چوٹ آئی ہے۔
لبنانی فوج نے اپنے ایک بیان میں کہا تھا کہ “عوکر کے علاقے میں لبنان میں امریکی سفارت خانے پر شامی شہریت کے ایک شخص کی طرف سے فائرنگ کی گئی۔ علاقے میں تعینات فوجی اہلکاروں نے فائرنگ کرکے جواب دیا، حملہ آور زخمی ہوگیا تو اسے گرفتار کرکے اسپتال منتقل کردیا گیا ہے۔
ایک عدالتی ذریعے نے ایجنسی فرانس پریس کو بتایا کہ فائرنگ کرنے والا شدید زخمی تھا اور اس نے بتایا کہ اس نے حملہ غزہ کی حمایت میں آپریشن کے طور پر کیا۔
سکیورٹی ذرائع نے بتایا کہ حملہ آور مشرقی لبنان میں البقاع کے علاقے مجد عنجر میں رہتا ہے۔ اس نے یہ کارروائی تنہا کی ہے۔ سکیورٹی فورسز نے حملہ آور کے بھائی اور والد اور اس کو جاننے والے پانچ دیگر افراد کو گرفتار کرلیا ہے۔
