لیبیا کے ہلالِ احمر اور سکیورٹی ڈائریکٹوریٹ کا کہنا ہے کہ ’ملک کے جنوب مشرق اور مغرب میں چار اجتماعی وبروں سے تارکین وطن کی 29 لاشیں برآمد کر لی گئی ہیں۔
لیبیا کے ضلع الواحات کے سکیورٹی ڈائریکٹوریٹ نے ایک بیان میں لاشیں ملنے کی تصدیق کی۔
حکام کے مطابق یہ لاشیں فارم میں موجود چار قبروں سے دریافت ہوئیں، ان میں سے ایک قبر میں ایک لاش جبکہ دوسری قبر میں چار لاشیں دفنائی گئی تھیں۔ چوتھی قبر میں ایک ساتھ 14 لاشوں کو دفنایا گیا تھا۔
بیان میں مزید کہا گیا ہے کہ ’یہ لاشیں لیبیا کے دوسرے بڑے شہر بن غازی سے 441 کلومیٹر دور جکھارا کے علاقے میں ایک اجتماعی قبر سے دریافت ہوئیں۔
سکیورٹی ڈائریکٹوریٹ نے فیس بُک پر تصاویر شیئر کیں جن میں پولیس اہلکار اور ہلال احمر کے رضاکار ان لاشوں کو پلاسٹک کے بیگز میں ڈال رہے ہیں۔
سکیورٹی ڈائریکٹوریٹ کا مزید کہنا ہے کہ ’ان لاشوں کا تعلق اسمگلنگ کی سرگرمیوں سے ہے۔‘
حکام کے مطابق تمام لاشوں کو فورینزک ٹیسٹ کے لیے ڈاکٹر کے پاس بھجوا دیا گیا ہے۔
واضح رہے کہ لیبیا غیر قانونی تارکین کے یورپ جانے کا ایک اہم سمندری راستہ ہے اور اٹلی پہنچنے کی کوششوں کے دوران کشتیاں الٹنے سے اب تک سینکڑوں افراد اپنی جان سے ہاتھ دھو بیٹھے ہیں۔
