غزہ میں محصور فلسطینیوں کے لیے امدادی سامان لے جانے والے ٹرکوں پر اسرائیلی شدت پسندوں نے حملہ کردیا۔
امدادی ٹرک اسرائیلی علاقے سے غزہ میں داخل ہونے والے تھےکہ اسرائیلی شدت پسند ٹرکوں پر چڑھ گئے اور ٹرکوں پر رکھی آٹے کی بوریاں زمین پر پھینک دیں اور دیگر خوراک بھی ضائع کردی۔
اس موقع پر اسرائیلی پولیس خاموش تماشائی بنی رہی جس کے باعث ہزاروں ٹن خوراک ضائع کردی گئی۔امدادی ٹرک اردن کی جانب سے بھجوائے گئے تھے۔
ادھر اسرائیلی فوج کے غزہ میں حملے جاری ہیں، رہائشی علاقوں پر بمباری سے گزشتہ 24 گھنٹوں میں مزید 33 فلسطینی ہلاک ہوگئے۔
اقوام متحدہ سربراہ کا کہنا ہے رفح میں اسرائیلی آپریشن غزہ کی مزید بربادی میں ناقابل برداشت اضافہ ہوگا۔
دوسری جانب اسرائیلی وزیراعظم نیتن یاہو نے ڈھٹائی کا مظاہرہ کرتے ہوئےکہا ہےکہ غزہ جنگ بندی معاہدہ ہو نہ ہو رفح میں فوجی آپریشن ضرور ہوگا اور کسی بھی عالمی عدالت کا فیصلہ ہمارے جنگ کے مقاصد کو نقصان نہیں پہنچا سکتا۔
خیال رہے کہ رفح میں غزہ پٹی کے دیگر علاقوں سے جبری بے دخل کیے گئے 10 لاکھ سے زیادہ فلسطینیوں نے پناہ لی ہوئی ہے۔
