معزول گبونی صدر کی اہلیہ منی لانڈرنگ کے الزام میں گرفتار

گبون کے معزول صدر علی بونگو اونڈیمبا کی اہلیہ سلویا بونگو کو منی لانڈرنگ کے الزام میں گرفتار کر لیا گیا۔

غیر ملکی میڈیا کے مطابق گبون کے پبلک پراسیکیوٹر نے جمعہ کو کہا کہ سلویا بونگو پر منی لانڈرنگ اور دیگر جرائم کا الزام عائد کیا گیا ہے۔

معزول گبونی صدر کے بڑے بیٹے نورالدین بونگو ویلنٹائن پر پہلے ہی کرپشن کا الزام عائد کیا جا چکا ہے۔

پراسیکیوٹر آندرے پیٹرک نے جمعہ کو بتایا کہ سابق خاتون اول پر جمعرات کو ایک تفتیشی جج نے فرد جرم عائد کی اور ان کی گھر پر نظر بندی کے حکم کو بھی برقرار رکھا گیا ہے۔

سلویا بونگو 30 اگست کو اپنے شوہر کی حکومت کا تختہ الٹنے کے بعد سے نظر بند ہیں۔

خیال رہے کہ علی بونگو نے اپنے والد کے تقریباً 42 سال اقتدار میں رہنے کے بعد اقتدار سنبھالا تھا اور رواں سال اگست میں صدارتی انتخابات کے بعد فوج بغاوت ہونے تک ملک پر حکومت کی۔