مقتول صحافی جمال خاشقجی کی اہلیہ کو امریکا میں سیاسی پناہ مل گئی

ترکی کے شہر استنبول میں قتل کیے گئے سعودی صحافی جمال خاشقجی کی اہلیہ حنان ایلاتر کو امریکا میں سیاسی پناہ مل گئی۔

شوہر کی موت کے بعد جمال خاشقجی کی اہلیہ حنان ایلاتر اگست 2020 میں امریکا پہنچیں تھیں۔ حنان ایلاتر کو 28 نومبر کو غیر معینہ مدت کے لیے سیاسی پناہ مل گئی ہے۔

امریکی اخبار واشنگٹن پوسٹ سے منسلک سعودی صحافی جمال خاشقجی 2 اکتوبر 2018 کو ترکی میں استنبول میں واقع سعودی قونصل خانے سے لاپتہ ہو گئے تھے جس کے بعد ان کو قتل کیے جانے کی تصدیق ہوئی تھی۔

بعد ازاں سعودی عرب کی جانب سے اس بات کا اعتراف کیا گیا تھا کہ سعودی صحافی جمال خاشقجی استنبول میں واقع قونصل خانے میں لڑائی کے دوران ہلاک ہوئے۔