پاکستان پیپلزپارٹی کے چیئرمین بلاول بھٹو زرداری نے کہا ہے کہ اگر میرے ووٹ پر ڈاکا ڈالا گیا اور چھیڑ چھاڑ ہوئی توپھر ان کا ایسے پیچھا کروں گا کہ وہ عمران خان کو بھول جائیں گے۔
لاڑکانہ میں انتخابی جلسے سے خطاب میں بلاول بھٹو زرداری کا کہنا تھاکہ انتخابی مہم میں پورے ملک کا دورہ کیا، ملک بھرمیں مہم چلانے کے بعد آج اپنے گھرواپس آیا ہوں، جب لاڑکانہ وزیراعظم بناتا ہےتوپاکستان میں ترقی ہوتی ہے، جب لاڑکانہ وزیراعظم بناتا ہے توپاکستان پوری مسلم امہ کی قیادت کرتا ہے۔
ان کا کہنا تھاکہ پرانے سیاستدان آج تک سیاست میں ہیں، پرانے سیاستدان نفرت اورتقسیم کے علاوہ کچھ نہیں دیتے، ان لوگوں نے سیاست کو سیاست نہیں بلکہ گالی بنادیا ہے، پورا ملک مایوس ہے کہ کیا یہ ہماری قسمت میں ہے کہ ان کی شکلیں دیکھنی ہیں، پرانے سیاست دانوں کی ضد اورانا کی وجہ سے معیشت کونقصان ہوا ہے، ان لوگوں نے اپنی ضد کی وجہ سے معیشت، ملک اورجمہوریت کونقصان پہنچایا ہے۔
نواز شریف کا نام لیے بغیر بلاول بھٹو زرداری کا کہنا تھاکہ یہ شخص چوتھی بار ملک کا وزیراعظم بننا چاہتا ہے، یہ لوگ پاکستان کے عوام کوبیوقوف بنانا چاہتے ہیں، عوام ان کو اور ان کے طریقہ کارکوپہچانتے ہیں۔
“جب لاڑکانو سے وزیر اعظم بنتا ہے تو پھر مزدوروں کو محنت کا صلہ ملتا ہے ،ہاریوں اور کسانوں کو فصل کی قیمت بھی ملتی ہے، اس ملک کے نوجوانوں کو روزگار کے مواقع ملتے ہیں، اس ملک کا سفید پوش طبقہ، چھوٹے تاجر بھی ترقی کرتے ہیں، جب لاڑکانو کا وزیر اعظم بنتا ہے تو ملک میں بلاتفریق کام کیا… pic.twitter.com/2zjYOl1VFt
— PPP (@MediaCellPPP) February 6, 2024
انہوں نے مزید کہا کہ میں یہ نہیں کہہ سکتا کہ سندھ میں دودھ اور شہد کی نہریں بہادیں ہیں، اگر میرے ووٹ پر ڈاکا ڈالا گیا چھیڑ چھاڑ ہوئی توپھر ان کا ایسے پیچھا کروں گا کہ وہ بانی پی ٹی آئی کو بھول جائیں گے۔
ان کا کہنا تھاکہ میں نے بانی پی ٹی آئی کو پہلے دن سلیکٹڈ کہا تھا اور 3 سال سے زیادہ نہیں چل سکے، اگر وہ صاف شفاف الیکشن جیتتے ہیں تو بسم اللہ، ووٹ پر ڈاکا منظور نہیں ہوگا، یہ ثابت کردوں گا کہ لاڑکانہ والے فیصلہ کرجاتے ہیں تو پورے پاکستان کو وہ فیصلہ ماننا پڑتا ہے، آج رات پوری نیند کرلیں، اگلی راتیں نیند کرنے کو نہیں ملے گی، ہم اپنے نتائج کے ساتھ نکلیں گے۔
