میکسیکو کی ساحلی ریاست ویراکروز میں مسلح افراد نے حکمراں جماعت کی جانب سے میئر کی امیدوار سمیت 5 افراد کو قتل کردیا، جو یکم جون کے انتخابات سے قبل مذکورہ ریاست میں اس نوعیت کی ہلاکت کا دوسرا واقعہ ہے۔
مورینا پارٹی کی امیدوار یسینیا لارا گوتریس پر حملہ اس وقت ہوا جب وہ ٹیکسسٹیپیک کے راستے حامیوں کے ایک کارواں کی قیادت کر رہی تھیں، حملے میں مزید 3 افراد زخمی ہوئے۔
گورنر روکیو ناہلے کے مطابق مارے جانے والوں میں لارا گوتریس کی بیٹی بھی شامل ہیں، ٹیکسسٹیپیک کوٹزاکوالکوس کی اہم پٹرولیم انڈسٹری سے جڑی بندرگاہ کے جنوب مغرب میں واقع ایک قصبہ ہے۔
لارا گوتریس میئر کے عہدے کی دوسری امیدوار ہیں جنہیں انتخابی مہم کے دوران ویراکروز میں قتل کیا گیا، 29 اپریل کو انتخابی مہم کے پہلے سرکاری دن، مسلح افراد نے میکسیکو کی حکمراں جماعت کے امیدوار ہرمن انوآر وایلنسیا کو ہلاک کردیا تھا۔
گورنر روکیو ناہلے نے کہا کہ 57 مقامی امیدواروں نے ریاست اور وفاقی حکومت کی طرف سے پیش کردہ سیکورٹی کی درخواست کی تھی۔
یکم جون کو میکسیکو کی ریاست ویراکروز میں بلدیاتی انتخابات شیڈول ہیں، تاریخی طور پر انتخابی تشدد کا سب سے زیادہ خطرہ مقامی امیدوار کو درپیش ہوتا ہے کیونکہ اس موقع پر منظم جرائم پیشہ گروہ مقامی حکومتوں کا کنٹرول حاصل کرنے کی کوشش کرتے ہیں۔
