پاکستان مسلم لیگ(ن) کے قائد میاں نواز شریف نے جمعیت علمائے اسلام (ف) کے سربراہ مولانا فضل الرحمٰن سے ملاقات کی ہے۔
اسلام آباد میں مولانا فضل الرحمن کی رہائش گاہ پر ہونے والی ملاقات سے متعلق (ن) لیگ کے رہنما رانا ثناء اللہ نے بتایا کہ پہلے نواز شریف کی سربراہی میں آنے والے وفد نے سربراہ جے یو آئی سے ملاقات کی اور بعدازاں دونوں رہنماؤں میں ون آن ون ملاقات بھی ہوئی۔
ان کا کہنا تھا کہ دونوں رہنماؤں کی ون آن ون ملاقات میں ہونے والی گفتگو کے بارے میں کسی اور موقعے پر آگاہ کیا جائے گا۔
رانا ثنا اللہ کا کہنا تھا کہ ہم نے اور مولانا فضل الرحمن نے ساتھ ساتھ مشکل وقت گزارا ہےا ور ہمیشہ ان سے رہنمائی لی ہے۔
ذرائع کے مطابق ملاقات میں ملکی سیاسی صورتحال پر بات چیت کی اور نوازشریف نے مولانا فضل الرحمان کو ساتھ چلنےکی دعوت دی۔
ذرائع کا کہنا ہے کہ ملاقات میں مولانا فضل الرحمان نے نوازشریف سے گلے شکوے بھی کیے جبکہ مسلم لیگ ن کے قائد نے مولانا سے حکومت سازی میں مدد کی درخواست کی۔